Илъэс 150 фэдиз хъугъэу адыгэхэр
итэкъуахьыгъэу дунаем тетых. Адыгабзэри ащ фэдэкъабзэу итэкъуахьыгъэу чIы
хъураем ичIыпIэ пэпчъ зэхэпхышъунэу дунаем тет.
Илъэс 150-р макIэп. Бзэр цIыфым идунае еплъыкI. ШIыкIэу, гупшысэу
къытхэлъыр тибзэкIэ къэтIон тэлъэкIы.
ЦIыф цIыкIум ишэн щыщ
«лъыбанэрэм, лъыплъэрэм, лъыхъурэм» ыгугъу ышIыныр. Ныбэ фалIэ зылIэрэр, шхыным
ыгугъу ешIы. Ыцэ зыузырэм ыбзэгу а цэ узырэм лъекIо хабз.
ТыкъэгущыIэзэ тыжэ дэкIыхэрэр
нахьыбэмкIэ тигу илъхэр арых. Хэкум ис адыгэхэмкIэ мы гущыIэхэм ямэхьанэ
зымышIэрэ къытхэмытыныри къыдыхэт, Ахъщэпс, былымыпс.....
Мы гущыIэхэм къикIырэри нафэ дэд. Ыпсэ фэдэу
ахъщэм, былымым фэщагъэр ары. Совет гъэпсыкIэр зэблэхъу ыуж, капиталист дунае
зэхэтыкIэр-еплъыкIэр союз чIыналъэм къуачIэ, лъапсэ щегъоты къынэужы мы
гущыIэхэр нахь зэхэтэхы хъугъ.
Ахъщэм, былымым лъэшэу фэбанэрэ,
Iаеу фэщагъэ хъугъэхэм апае ахъщэпс, былымыпс гущыIэхэм нахь кIуачIэ хэлъ
IуакIэ щымыIэн фай. Мы гущыIэхэм джырэ адыгабзэкIэ яIэ кIуачIэр цIыфхэм ахъщэр,
былымыр икъу фэдизэу агъотыгъэу ашIошIымэ кIодыжьыщт, нахь макIэуи
дгъэфедэщтых.
Джащ фэдэкъабзэу хэхэс адыгэхэми
яхэкужъ къагъэзэжьын амал агъоты ыуж адыгэ гущыIэжъ горэхэм апсэ
хэхъожьыгъ. «Хэкупсэ, хэгъэгупс,
лъэпкъыпсэ». Ихэку, ихэгъэгу, илъэпкъ ыпсэ фэдэ зыгъэлъапIэрэр, ащ ыпсэ фэдэу
фэщагъэр мэхьанэ зиIэ мы гущыIэхэр хэхэс адыгэхэм атхыгъэхэм, къаIорэхэм нахьыбэу
къыхафэу фежьагъ.
Джары бзэмрэ лъэпкъым азфагу дэлъ
зэпхыныгъэр, цIыфхэм щыкIагъэ иIэхэр бзэм хэуцорэ шIыкIэр. Зихэку исым мы
гущыIэхэр ащ фэдиз ыгъэфедэу зэхэпхыщтэп. Сыда пIомэ ихэку ис, ащкIэ ар анахь
ыпэ ишъыгъэ щыкIагъэхэм ащыщэп, ащ къыхэкIэу ыгугъу зышIырэри макIэ дэд.
Тхыгъэхэм мы гущыIэхэр бэрэ итэу плъэгъущтэп, гъотыгъуаех.
КIэухэу –псэ зыфиIорэм пылъ къэбэрэу
къэдгъэлъэгъуагъэм къытиIорэр; тилъэпкъ дунаем тетыкIэу иIэр тэрэзэу зэхэтфыным
паеу бзэу ыгъэфедэрэри икъоу зэхэтфын фаер ары....
АЦУМЫЖЪ Митхьатыкъоу Хьилым