СЭ СЫIУЦОЦОЖЪ
Хъуапкъыри,
аргъоири
хьэцIэпIацI
Ау хъуапкъ тетIысхьагъэр
Аргъой тетIысхьагъэм фэдэу
«Мыр хьэцIэпIацI»
Джары
цIыфым изэхьэлъыкIэ.
Муары къэсыгъ
бжыхьэкIэ.
Тыгъэстыри щыIэпи,
чъыгым,
гъэмэфэ гохьыпIэу
чъыг жьаум
ыгугъу зышIын
къэнэжьыщтэп.
Джары
цIыфым изэхэлъыкIэ,
дахэлыхъу,
шIуагъэлъыхъу.
Хэт ищыкIагъ
кIымафэ чъыг жьау.
Джары,
джар сиIэпэубыт,
Джары,
сыфежьагъэ къэбарым ылъапс.
Зэхэшъухыщтыр
шъыпкъэр.
Тыгъэ нэбзыими
бжьыхьэми,
чъыг жьауми
якъэбэр
къышъосIотэщтэп.
Зэхэшъухыщтыр,
чъыгым,
цIыф цIыкIум,
сшъхьэ икъэбар.
Адыгэр Iушы,
пшъхьэ утегущыIэныр,
емыкIу.
ЕкIуми,
емыкIуми,
сшъхьэ сфэIоф.
Сызэрэ Ацумыжъыр шъошIэ,
сызэрэ бзэгурацор
зэхэшъухыгъэн фай.
Сызэрэ Iуцоцожъыри
джы зэжъугъэшIэщт.
КъэсымIомэ,
зызгъэушъэфымэ,
сызэрэ Iуцоцожъыр
ныбжьи
егъэшIэми
шъушIэщтыгъэп.
Джары
адыгэм
пшъхьэ утегущыIэныр
зыкIэмыхъоу, емыкIушхоу
зэрэлъытэрэм лъапсэу иIэр.
Сызтещынахьыжьырэп,
сыIуцоцожъми,
сыбзэгурацуми,
сишъыпкъэхэр,
сыгу илъ дэдэхэр,
уаимыри
уаипчъэри ахэр арых….
Джары
шъукъеблагъ
бзэгурацу
Iуцоцожъым
ИЗЫМАФ;
СыцIыф насыпышIу.
IофышIэ сэкIо
пчэдыжьрэ,
УзтекIорэ
пый мэхъаджэр,
зэрэчъэрэм фэдэу,
ащ слъэчъэрэм фэдэу
счъэзэ
IофшIапIэм сэкIо.
Сэ сыцIыф насыпышIу.
хьайнапэ мыхъунэу сшIэмэ,
нэфшъагъом, пасэ дэдэу
тыгъэр гъогу напцэхэм
темыпсэу,
IофышIэ сыкIощт.
Сэ сыцIыф насыпышIу.
Iофыр сыухъумэ,
IофшIапIэм сыдафыгъэм фэдэу
слъакъохэр скIыб еозэ
жьы къэсщэнэу ыгъо сымыфэзэ
счъэзэ-счъэзэ
унэм сэкIо.
Сэ сыцIыф насыпышIу.
сиIофшIапэри,
сиунэри
гупсэф.
СIэхэм аубыты,
синэхэм алъэгъу
шыкур сыпсау,
джары сынасыпышIу.
Джары
шъыпкъэ дэдэр
цIыфыр иунэми,
иIофшIапэми
игопэзэ,
чъэзэ кIомэ,
НасыпIушIу дэд.
Сиун,
сищагу,
гупсэфэу сыдэт.
СIупэ къыблэм фэзгъэзагъэу
тикъушъхьэхэр
чыжьэкIэ къалъэгъоу
унэ симыIэм фэдэу
нэмаз сшIэу
сищагу сыдэт.
УгукIэ гупсэфэу
сэсий зыфэпIорэ
огум учIэтэу,
чIылъэм утетэу,
пIэхэр къэпIэтэу
Алахьу-Iэкбэр
пIоным нахь шIагъо дунаем тетэп.
СIэхэр къэсэIэты
Алахьу-Iэкбэр!
фэзгъэзагъэр къыблэ,
Ау
тикъушъхьэхэр
гум илъыр
нэм елъэгъу!
Къысфэгъэгъу ситхьэ лъапI!
Сызэуфэ,
слъэгъурэр
сихэку ичIыналъ,
сичIыгу Iахь.
гум илъыр
нэм елъэгъу!
Къысфэгъэгъу ситхьэ лъапI!
Дюзджэр сыгу къекIы,
сыкъызщыхъугъэ къэлэр.
ащи икъыблэ лъэныкъор
къушъхьэтх.
Ситэтэжъ сыгу къекIы.
илIэкъокIэ Чэтэугъ.
илIэкъо къодыеп,
ежьыри чэтэуагъ.
Адыгэхэри цIыфых
адрэхэм афэдэу
ахэри шIуагъэлъыхъух,
ахэм
чатэр
агъэIорышIэнэу
аIыгъыгъ.
Ситэтэжъ, итэтэжъхэм
къыкIэлыгъэу
чэтэ заулэу
иIагъэр, еоой.
Ныбжьи
ичатэ
дэпкъыми пилъагъэп.
чэтао шъыпкъагъ.
Чэтэпэхэр
пеутышъ,
чатэхэр,
Натрыф шъэпкъ,
пиупкIынэу
Iэмэ-псымакIэу
Зэрэ Чэтаор ыгъэшъыпкъэжьынэу
иIыгъыгъ...
Чатэр
дэпкъым пылъмэ
пкIэ иIа?
СыцIыкIугъом
сыIуцоцужъыгъэп
Ау сымыгъоцагъ.
Натрыф хасэхэм
тыдэтэу,
чэтэпэ пыутыгъэхэм
ячэтэ апшъэхэр
тIыгъэу,
силIэкъокIэ сымычэтаоми
сычэтаоу
Абдзэхэхэмэ сэтхъэжьэу
сахэтыгъ.
Щэджагъо хъумэ,
Абдзахэхэр
Чъыг жьау лэхъух.
Ситэтэжъ тапэ итэу
нэмэзы тэшIэ.
Дюзджэми икыблэ
къушъхьалъ.
ау, ау
уимыкъушъхьэр
къыпфэIофынэ.
ЗыкIэ,
Iалахьу Iэкбэр
сIоу
сIэхэр къэсIэтыми
Тыркум икъушъхьэхэр
сыдкIэ былымых.
Гохьыр дахэр
сэ сымыемэ
сыдкIэ былым.
КъышъосIуагъэбэ
сэ, джы сыIуцоцожъми
сыцIыкIугъом
сымыгъоцэ
къодиягъ.
Нэмаз ужьым,
Абдзахэхэм янысэхэр,
апхъухэр, акъохэр
нэжькIэ къысэплъыхэзэ,
«Тэтэжъ, тыеужьырын фаеба!
мафэр хьаулыеу макIо
сидыгъо IофышIэ тыфежьэщт»
сIощтыгъ.
Джыри тIэкIу зыгъэпсэфын
зимурад
Абдзэхэ нысэхэр,
Абдзэхэпхъухэр
Абдзэхэкъохэр
НэжькIэ къысэплъыщтыгъэх.
Джары, джары
къышъосIуагъэба,
сымыгъоцагъ.
Джа уахътэжъхэм
сшIыгъэ нэмазхэми
пкIэ имыIэнкIи
мэхъу,
джары зыкIэсIорэр.
Непэ сыIуцоцожъ,
Адыгэ огур сшъхьэкIыIу,
Адыгэ чIыр силъэгучIэт,
Адыгэ къушъхьэхэр
сикъыблэ лъэныкъох.
сигу илъых.
Синэмазхэм,
сикыблэхэм
сицыхьэ темылъынэу
сыгу афызэх.
Джары сызэрэIуцоцожъыр,
синэмазыри
зэщыкъоным негъэсырэ,
мы хэку шIулъэгъуныгъэм
есшIэщтыр сшIэрэпи
сыIуцоцожъ.
АЦУМЫЖЪ Хь.